Raza Musani 
دوحہ : قطر میں ہندوستانی بحریہ کے 8 سابق اہلکاروں پر جاسوسی کے الزامات میں مقدمے کا آغاز کردیا گیا۔ ہندوستانی بحریہ کے اہلکاروں پرالزام ہے کہ انہوں نے اٹلی میں تیار کی جانے والی ہائی ٹیک آبدوزوں کے حصول کے قطر کے خفیہ منصوبے سے متعلق معلومات اکٹھی کیں۔ یہ8 افراد دہراء گلوبل ٹیکنالوجیز اینڈ کنسلٹنسی سروسز نامی کمپنی کے لیے کام کر رہے تھے، جسے قطر کے دفاع اور دیگر ایجنسیوں کامقامی کاروباری شراکت دار قرار دیا گیا تھا۔ انہیں اگست 2022 میں گرفتار کیا گیا تھا، حالانکہ اس وقت کوئی سرکاری الزامات نہیں لگائے گئے تھے، لیکن یہ شبہ بڑے پیمانے پر لگایا گیا تھا کہ وہ اسرائیل کی طرف سے جاسوسی کر رہے تھے۔ ایک انٹیلی جنس ذرائع کے حوالے سے کہا گیا ہے ہندوستان نے دوحہ میں اپنے ہم منصبوں کو یہ باور کرانے کی بھرپور کوشش کی ہے کہ ہندوستان اور اس کے شہری امارات کے خلاف دشمنانہ انٹیلی جنس کارروائیوں میں ملوث نہیں ہیں۔ لیکن قطری اس بات پر اصرار کر رہے ہیں کہ ان کے آبدوز پروگرام کے بارے میں خفیہ معلومات اسرائیل کو دی گئی تھیں۔
