مجلس وحدت مسلمین کا پنجاب کے بلدیاتی انتخابات میں حصہ لینے کا اعلان

لاہور : مجلس وحدت مسلمین نے پنجاب کے بلدیاتی انتخابات میں حصہ لینے کا اعلان کردیا۔ بلدیاتی انتخابات کے حوالے سے پنجاب سیکریٹریٹ لاہور میں عہدیداروں کا اجلاس ہوا۔ جس میں مرکزی ڈپٹی سیکریٹری جنرل علامہ احمد اقبال رضوی نے خصوصی طور پر شریک ہوئے۔مرکزی سیکریٹری سیاسیات سید اسد نقوی نے بلدیاتی انتخابات سے متعلق ضلعی سطح پر کارکردگی کا جائزہ لیا اور شرکا سے گفتگو کرتے ہوئے کہا کہ بلدیاتی انتخابات میں مجلس وحدت مسلمین لاہور مختلف و مخصوص یونین کونسلز سے امیدوار میدان میں اُتارے گی۔ ضلعی سیکریٹری جنرلز اپنے اضلاع میں بلدیاتی انتخابات کی سرگرمیوں کے حوالے سے پیش رفت کریں۔ انہوں نے کہا کہ اس بلدیاتی انتخابات میں گزشتہ بلدیاتی انتخابات سے بہتر نتیجہ اخذ کرنے کیلئے پہلے سے زیادہ محنت کیساتھ میدان میں اترنا ہوگا۔ سینیئر ممبر پولیٹیکل کونسل سید حسین زیدی نے کہا ہے کہ انشا اللہ مجلس وحدت مسلمین لاہور، مرکز کی پالیسی پر مکمل عمل پیرا ہوگی اور بہتر نتائج حاصل کرنے کیلئے عملی جدوجہد کو اپنا نصب العین بناتے ہوئے قائدِ وحدت کے حکم پر عملدرآمد یقینی بنائے گی۔