لبنان کو امریکا کے مشوروں کی ضرورت نہیں ہے، حزب اللہ

بیروت : حزب اللہ کی ایگزیکٹو کونسل کے سربراہ ہاشم صفی الدین نے امریکی سفیر کو مخاطب کرتے ہوئے کہا کہ وہ اپنے آقاؤں سے کہیں کہ لبنانیوں کو مشورہ دینے کے بجائے اس ملک کی اقتصادی امداد تک رسائی کی راہ میں رکاوٹیں کھڑی نہ کرے۔ انہوں نے امریکی صدر کے مشیر آموس ہوچسٹین کے الفاظ کے جواب میں زور دے کر کہا ہے کہ لبنان کو امریکا اور ہوچسٹین کے آقاؤں کے مشورے کی ضرورت نہیں کیونکہ یہی لوگ بیروت کی اقتصادی امداد تک رسائی کی راہ میں رکاوٹیں کھڑی کر رہے ہیں۔ انہوں نے مزید کہا کہ اگر امریکی اپنے وعدوں کے سچے تھے تو انہیں کم از کم مصری گیس کے حوالے سے لبنانیوں کے ساتھ کئے گئے اپنے وعدے پورے کرنے چاہئیں۔ یہ بات واضح ہے کہ ہم نے کبھی بھی امریکہ اور اس کے وعدوں پر بھروسہ نہیں کیا اور نہ ہی آئندہ کبھی کریں گے کیونکہ ہم امریکہ کو لبنان اور لبنانی عوام کا حقیقی دشمن سمجھتے ہیں۔ انہوں نے کہاکہ قانا قتل عام اور دیگر جرائم امریکی ہتھیاروں، طیاروں اور میزائلوں کے سبب انجام پائے ہیں۔ امریکی ہتھیاروں کے ذریعے لبنانیوں کو مارا گیا ہے اور فلسطینیوں کو ہر روز مارا جا رہا ہے۔