اردن کا اسرائیل سے سفیر بلانے کا اعلان

عمان: اردن کو غیرت آگئی اور وہ تل ابیب سے اپنا سفیر واپس بلانے والا پہلا مسلمان ملک بن گیا۔ اردن کی وزارت خارجہ نے کہاہے کہ سفیروں کے دوطرفہ تبادلے کا معاملہ اب غزہ کے خلاف اسرائیلی جارحیت رکوانے سے مشروط ہے۔ وزارت خارجہ کے مطابق اردن کے اندر مظاہروں کے پیش نظر اسرائیلی سفیر دو ہفتے قبل اسرائیل چلے گئے تھے وہ اب صرف غزہ میں جنگ بندی کی صورت میں ہی واپس آ سکیں گے۔
اس سے پہلے لاطینی امریکا کے ملک بولیویا نے اسرائیل کے ساتھ سفارتی تعلقات منقطع کر لیے تھے۔ بولیویا کی نائب وزیر خارجہ نے کہا تھا کہ غزہ میں اسرائیلی کارروائی جارحانہ ہے۔ بولیویا جنگ بندی اور غزہ کی ناکہ بندی کے خاتمے کا مطالبہ کرتا ہے۔ ادھر لاطینی امریکا کے دوملکوں چلی اور کولمبیا نے اپنے سفیر اسرائیل سے واپس بلالئے تھے۔ جبکہ مصر۔ بحرین۔ عرب امارات سمیت کسی مسلمان ملک نے اسرائیل کیخلاف یہ قدم نہیں اٹھایا۔