Raza Musani 
لاہور: جامعہ عروۃ الوثقیٰ اور تحریک بیداری امت مصطفی ص کے سربراہ علامہ سید جواد نقوی کا اپنے خطاب میں کہنا تھا کہ غزہ اور کشمیر کے مظلوموں سے لاتعلقی اور انسانیت سوز جرائم پر آنکھیں بند کر لینا امت مسلمہ کی سب سے بڑی آفت اور گویا انکی موت کی مانند ہے۔ اسرائیل میں صیہونی یہودیوں کی اکثریت ہونے کے باوجود، آج کئی صیہونی بھی غزہ میں جاری ظلم و ستم کے خلاف آواز اٹھا رہے ہیں، لیکن افسوس کا مقام ہے کہ مسلمان دنیا ابھی تک خواب غفلت میں ڈوبی ہوئی ہے جو نجانے کس منہ سے ربیع الاول میں جشن منانے کی تیاریاں کر رہے ہیں، اور کیسے اس نبی ﷺ کا نام اپنی زبان پر لانے کی جرآت کرتے ہیں کہ جنکی امت غزہ میں بے دردی سے قتل کی جا رہی ہے اور یہ سب شرمناک خاموشی کی چادر اوڑھے بیٹھے ہیں۔ انہوں نے مزید کہا کہ اس خاموشی، خباثت و ناکارہ پن کی وجہ ان مذہبی عناصر کا وہ بغض ہے جو غزہ کی حمایت و نصرت کرنے والوں کے متعلق ظاہر کیا ہے اور اس ناطے مسلمانوں کو غزہ سے لاتعلق رہنے کا باقاعدہ سبق پڑھایا گیا ہے۔ انہوں نے اسرائیل کے خلاف آواز بلند کرنے اور فلسطین و غزہ کی حمایت کو جرم سمجھنے کو انتہائی افسوسناک قرار دیا اور کہا کہ پاکستان میں بھی احتجاج کرنے والوں کو گرفتار کیا جا رہا ہے اور ان پر ظلم کیخلاف آواز نہ اٹھانے کے لیے دباؤ ڈالا جا رہا ہے.
