ایران کے جوہری معاملات کو بات چیت سے حل کیا جائے، قطر

دوحہ : قطر کے وزیر خارجہ محمد بن عبدالرحمن آل ثانی نے دوحہ میں فرانس کی وزیر خارجہ کیتھرین کولونا کے ساتھ ملاقات کی اور ایران، فلسطین، شام اور لبنان سمیت خطے کے مختلف مسائل پر بات چیت کی۔ملاقات کے بعد پریس کانفرنس سے خطاب کرتے ہوئے قطر کے وزیر خارجہ نے کہا کہ قطر فرانس کے ساتھ مختلف معاملات میں تعاون کا خواہاں ہے۔ دوحہ اور پیرس کے درمیان مختلف معاملات میں تعاون سے خطے اور بین الاقوامی سطح پر مسائل حل کرنے میں مدد ملے گی۔ انہوں نے مزید کہا کہ لبنان، شام اور ایران کے جوہری معاملات جیسے امور پر فرانس کی طرف سے ہونے والی کوششوں کی قطر حمایت کرے گا۔ ہم فلسطینی عوام کے حقوق کی حمایت کرتے ہیں اور 1967 کی سرحدوں کے مطابق ایک مستقل اور خودمختار فلسطین کے قیام کے خواہاں ہیں۔ شام کے بحران کا حل نکالنے کے لئے اقوام متحدہ کی چارٹر کے مطابق کوشش کی جائے۔ ہم شام کے مسئلے کا عادلانہ حل چاہتے ہیں اور شامی مہاجرین کی فوری واپسی کی خواہش رکھتے ہیں۔