حملوں میں تعاون، ایران نے پڑوسی ممالک سے وضاحت مانگ لی

تہران: ایران نے خلیجی ممالک پر امریکا کے ساتھ مل کر ایران کے خلاف سازش کا الزام عائد کرتے ہوئے ان سے واضح مؤقف مانگ لیا۔ ایران کے وزیر خارجہ عباس عراقچی نے کہا ہے کہ کچھ خلیجی ممالک، جہاں امریکا کی فوجی موجودگی ہے، خفیہ طور پر ایران کے خلاف کارروائیوں کی حوصلہ افزائی کر رہے ہیں۔ ان پڑوسی ریاستوں کو اپنا مؤقف فوری واضح کرنا چاہیے۔ انہوں نے محمد بن سلمان اور ڈونلڈ ٹرمپ کے درمیان مبینہ رابطوں پر وضاحت کا مطالبہ کرتے ہوئے کہا کہ رپورٹس کے مطابق سعودی ولی عہد نے امریکا کو ایران پر مزید سخت حملوں پر اکسایا۔ عراقچی کے مطابق حالیہ امریکی اور اسرائیلی حملوں میں سینکڑوں شہری جاں بحق ہوئے، جن میں 200 سے زائد بچے بھی شامل ہیں۔
دوسری جانب علی لاریجانی نے خلیجی ممالک کے عوام سے سوال کیا کہ وہ اس جنگ میں کس کے ساتھ کھڑے ہیں اور کیوں کوئی اسلامی ملک ایران کے ساتھ نہیں کھڑا ہوا۔ انہوں نے کہا کہ اگر خلیجی ممالک میں موجود امریکی اڈوں سے ایران پر حملے کیے جائیں گے تو ایران خاموش نہیں رہ سکتا، اور موجودہ کشمکش امریکا و اسرائیل اور ایران و مزاحمتی قوتوں کے درمیان ہے۔