سعودی عرب میں بس حادثہ، 20 زائرین جاں بحق، 29 زخمی

مکہ : سعودی عرب میں عمرہ زائرین کی بس خوفناک حادثے کا شکار ہوگئی۔ حادثے میں 20 افراد جاں بحق ۔ 29 زخمی ہوگئے۔ زائرین کی بس خمیس مشیط سے مکہ مکرمہ جارہی تھی کہ عسیر کے علاقے عقبہ شعار میں حادثے کا شکار ہوگئی۔ بس پل کے آخری حصے سے ٹکرا کر الٹ گئی اور اس میں آگ لگ گئی۔ شہری دفاع اور ہلال احمر کی ٹیموں نے موقع پر پہنچ کر امدادی کارروائی کی، زخمیوں کو سینٹرل اسپتال اور ابہا کے پرائیویٹ اسپتال منتقل کیا۔ بس میں زیادہ تر غیر ملکی زائرین سوار تھے۔ ابھی یہ پتہ نہیں چل سکا کہ غیرملکیوں کا تعلق کن ممالک سے ہے۔ سیکیورٹی اہلکاروں نے حادثے کے بعد شعار درہ بند کردیا اور وہاں سے ٹریفک کے گزرنے کے لیے متبادل راستہ بنایا گیا ہے۔ پولیس کے مطابق حادثہ بس کے بریک سسٹم میں خرابی کے باعث پیش آیا۔