Raza Musani 
نیویارک: اقوام متحدہ کے سیکریٹری جنرل انتونیو گوتریس نے سوڈان کے مزید ٹکڑے ہونے کا خدشہ ظاہر کردیا۔العربیہ ٹیلی ویژن کو انٹرویو میں انتونیو گوتریس نے کہا کہ جب ملک ٹوٹ رہا ہو تو لڑائی کا کوئی جواز نہیں بنتا۔ انہوں نے اپیل کی ہے کہ سوڈان میں امن کی بحالی کے لیے افریقی قیادت میں ہونے والے اقدامات کی ہر ممکن حمایت کی جائے۔گوترس نے خبردار کیا کہ سوڈان میں جو کچھ ہو رہا ہے اس سے اندرون اور بیرون ملک مہاجرین کی مزید نقل و حرکت شروع ہو جائے گی۔ادھر اقوام متحدہ کے غذائی پروگرام کے مطابق مسلح افواج کے درمیان جاری لڑائی سے مزید لاکھوں افراد بھوک کی لپیٹ میں آ سکتے ہیں جہاں پہلے ہی ایک تہائی آبادی قحط کا مقابلہ کر رہی ہے۔سوڈان میں فوج اور پیراملٹری فورسز کے درمیان جاری لڑائی تیسرے ہفتے میں داخل ہو گئی ہے جبکہ سینکڑوں افراد ہلاک اور ہزاروں نقل مکانی کرنے پر مجبور ہوئے ہیں۔
