غزہ میں اسرائیلی بمباری سے مزید 150 فلسطینی شہید

غزہ: غزہ میں اسرائیلی فوج نے خان یونس میں واپس لوٹنے والے شہریوں پر قیامت ڈھادی۔ خان یونس سے پسپا ہوتی اسرائیلی فوج نے شہریوں پر گولیاں برسا دیں جس سے تیس فلسطینی شہید ہوگئے۔ جبکہ واپس لوٹے شہریوں کی گرفتاری شروع کردی ہے اور سینکڑوں فلسطینیوں کو گرفتار کرلیا ہے۔ گرفتار افراد میں بچے اور خواتین بھی شامل ہیں۔امدادی ایجنسیوں کے مطابق اسرائیلی فوجیوں کے تشدد سے کئی افراد زخمی بھی ہوئے ہیں۔ دیرالبلاح میں فضائی حملوں میں چالیس فلسطینی شہید ہوئے ہیں۔ زیتون میں اسرائیلی فوج کے نام نہاد کلیئرنس آپریشن میں چالیس فلسطینی شہید ہوگئے۔ رفح میں اسرائیلی بمباری سے تین عمارتیں گرگئیں جس سے چالیس افراد شہید ہوگئے۔
حماس کے جوابی حملوں میں چار اسرائیلی فوجی ہلاک ہوئے۔ حماس کے مطابق زیتون اور خان یونس میں کئی اسرائیلی فوجی گاڑیوں کو تباہ کیا گیا ہے۔