Raza Musani 
کابل: افغانستان میں غیر ملکی این جی اوز کے اسکولوں پر پابندی کی خبروں سے تشویش کی لہر دوڑ گئی۔ اقوام متحدہ کےادارے یونیسیف نےخبردار کیا ہے کہ اگر طالبان نے غیر ملکی این جی اوز کے اسکولوں پر پابندی لگائی تو پانچ لاکھ لڑکے اور تین لاکھ لڑکیاں تعلیم سے محروم ہوجائیں گی۔ یونیسیف کی ترجمان برائے افغانستان سمانتھا مورٹ کا کہنا ہےکہ غیر ملکی این جی اوز کے اسکول بند کرانے کے فیصلے کی خبروں پر تشویش ہے۔ اس بارے میں مزید معلومات حاصل کر رہے ہیں۔ رپورٹ کے مطابق حالیہ دنوں میں انسانی ہمدردی کی ایجنسیوں نے سنا ہے کہ صوبائی حکام کو تعلیمی منصوبوں میں بین الاقوامی تنظیموں کی شمولیت کو روکنے کی ہدایت کی گئی ہے۔ تاہم طالبان انتظامیہ نے فی الحال ایسے کسی حکم کی تردید یا تصدیق نہیں کی ہے۔ طالبان نے 2021 میں اقتدار سنبھالنے کے بعد سے لڑکیوں کی تعلیم اور خواتین کی ملازمتوں پر پابندی عائد کر رکھی ہے۔
