عمران خان کیخلاف غداری اور بغاوت پر اکسانے کا مقدمہ درج

اسلام آباد: سابق وزیراعظم عمران خان کیخلاف سوشل میڈیا پلیٹ فارم ایکس پر متنازع پوسٹ پر غداری اور بغاوت پر اکسانے کا مقدمہ درج کرلیا گیا۔ وفاقی تحقیقاتی ادارے ایف آئی اے سائبر کرائم ونگ کی چار رکنی ٹیم اڈیالہ جیل پہنچی تاکہ عمران خان سے متنازع ٹوئٹ پر پوچھ گچھ کرسکے۔ ڈپٹی سپرنٹنڈنٹ کے ذریعے بانی پی ٹی آئی کو پوچھ گچھ کے لیے بلایا گیا لیکن انہوں نے وکلا سے مشاورت کا کہہ کر شامل تفتیش ہونے سے انکار کردیا۔ ایف آئی اے تحقیقات کررہی ہےکہ عمران خان کا اکاؤنٹ کہاں سے ہینڈل کیا جا رہا ہے اور کون کر رہا ہے اور ہدایات کہاں سے دی جاتی ہیں۔ واضح رہے کہ عمران خان کے ایکس اکاؤنٹ سے موجودہ حالات کا موازنہ انیس سو اکہتر میں بنگلہ دیش کے قیام سے متعلق حالات سے کیا گیا تھا۔ حکومت نے ان کی ٹوئٹ کو انتہائی متنازعہ قرار دیا ہے۔