ترکی کے داعش کو گولہ بارود دینے کا بھانڈا پھوٹ گیا

داعش کے اسلحے کے ذخیروں میں ایسا عسکری سامان بھی ملا، جو ترکی میں تیار کیا گیا تھا، ترکی نے شام میں داعش کو بھاری مقدار میں اسلحہ وگولہ بارود فراہم کیا
ہتھیار گوداموں میں دھماکے اس لئے کیے گئے تا کہ داعش کو مختلف ہتھیار فراہم کرنے میں ترک حکمراں جماعت کے ملوث ہونے کے شواہد مٹائے جا سکیں، رپورٹ
اسٹاک ہوم(نیوز ڈیسک) ترکی نے شام میں داعش کو بھاری مقدار میں اسلحہ وگولہ بارود فراہم کیا اور گوداموں میں دھماکے کرکے ثبوت مٹادئے ،اس بات کا انکشاف سویڈن کی ویب سائٹ نارڈک مانیٹر نے اپنی رپورٹ میں کیا،یہ رپورٹ ترکی میں فوجداری کی اعلیٰ عدالت کی فائلوں سے اِفشا ہونے والی عسکری انٹیلی جنس دستاویزات کی بنیاد پر مرتب کی گئی ہے، دستاویزات سے واضح ہوتا ہے کہ ہتھیاروں کے گوداموں میں دھماکے اس لیے کیے گئے تا کہ داعش کو مختلف نوعیت کا اسلحہ فراہم کرنے میں ترک حکمراں جماعت کے ملوث ہونے کے شواہد مٹائے جا سکیں،جن گوداموں میں دھماکے کئے گئے وہ افیون، اورفا اور قبرص کے شمال میں ترکی کے زیر کنٹرول اراضی میں واقع ہیں، رپورٹ کے مطابق ستمبر 2014 میں ترکی کے اخبار نے انکشاف کیاتھا کہ داعش کے اسلحے کے ذخیروں میں ایسا عسکری سامان بھی ملا، جو ترکی میں تیار کیا گیا تھا، اس انکشاف پر اخبار بند اور اس کے ایڈیٹر انچیف کو گرفتار کر لیا گیا، داعش کی جانب سے ترک اسلحہ اور گولہ بارود کا استعمال ستمبر 2014 میں اس وقت کے ترکی کے وزیر دفاع عصمت یلماز کے سامنے پیش کیے گئے سوال کا حصہ بھی تھا، یہ سوال رکن پارلیمنٹ لطفو تورکان نے پیش کیا تھا تاہم وزیر دفاع نے اس الزام کی تردید کر دی تھی