ایران:کورونا کی تباہی ،بہشت زہرہ میں جگہ کم پڑگئی

روزانہ 350افراد کی تدفین،15ہزار اضافی قبریں تیار کرلی گئیں
تہران (نیوز ڈیسک) کرونا کی وبا پھوٹ پڑنے کے بعد تہران کے قبرستان بہشت زہرہ میں جگہ کی کمی ہو گئی ہے، جس کے پیش نظرشہری قیادت کی ہدایت پر مزید 15 ہزار قبروں کے پلاٹ تیار کیے گئے ہیں ،جو کہ معمول کی سالانہ تعداد سے پانچ ہزار زیادہ ہیں ، اضافی قبریں کرونا وائرس کے متاثرین کے لیے بنائی گئی ہیں ،قبرستان کے منیجر خال نے بتایا کہ عام دنوں میں 150 سے 170 تک میتیں تدفین کے لیے لائی جاتی ہیں لیکن ان دنوں اوسطاً 350 میتیں لائی جا رہی ہیں ، جس سے قبرستان کے کارکنوں پر بہت بوجھ پڑ گیا ہے ،بہشت زہرہ کا شمار دنیا کے بڑے قبرستانوں میں ہوتا ہے، ایک اندازے کے مطابق وہاں 16 لاکھ سے زیادہ افراد دفن ہیں ، یہ پانچ مریع کلومیٹر پر پھیلا ہوا ہے۔