پاکستان کی سیاسی اور مذہبی جماعتوں نے ایرانی سائنسدان محسن فخری زادہ کے صہیونی دہشتگرد عناصر کے ہاتھوں قتل کی مذمت کی۔
مجلس وحدت مسلمین پاکستان کے سیکریٹری جنرل علامہ راجا ناصر عباس جعفری ، امیر جماعت اسلامی کراچی حافظ نعیم رحمان، فلسطین فاؤنڈیشن کے جنرل سیکریٹری صابر ابو مریم، تحریک اسلامی کے رہنما علامه سید عابد حسین الحسینی اور ثاقب اکبر سمیت پاکستان کی سیاسی اور مذہبی جماعتوں کے رہنماؤں اور اہم شخصیات نے ایران کے نامور سائنسدان محسن فخری زادے کی شہادت پر تعزیت و تسلیت پیش کرتے ہوئے کہا کہ محسن فخری زادہ کو علاقے کے حالات کو خراب کرنے کے مقصد سے قتل کیا گیا۔
پاکستان کی سیاسی اور مذہبی جماعتوں کے رہنماؤں نے ریاستی دہشتگردی کے فروغ میں سامراجی طاقتوں اور ان کے کچھ علاقائی اتحادیوں کے کردار کی جانب اشارہ کرتے ہوئے ایرانی سائنسدان کے قتل پر عالمی برادری کی خاموشی پر کڑی نکتہ چینی کی۔
انہوں نے کہا کہ امریکہ اور ناجائز صہیونی حکومت علاقے اور اسلامی ممالک میں عدم استحکام اور بدامنی پھیلانے میں ملوث ہیں۔ رہنماؤں نےایرانی سائنسدان کے قتل کو بین الاقوامی قوانین کی کھلی خلاف ورزی قرار دیتے ہوئے کہا کہ افسوس کی بات ہے کہ عالمی تنظیمیں امریکہ اور ناجائز صہیونی ریاست کی جانب سے قانون کی خلاف ورزی کو روکنے میں بے بس ہیں۔
