صیہونی ریاست مقاومت کے ہزاروں میزائلوں کے نشانے پر ہے، حماس

بغداد : حماس کے سیکریٹری جنرل زیاد النخالہ نے کہا ہے کہ فلسطینی قوم مغربی کنارے کے عوام دشمن غاصب صیہونیوں سے وسیع پیمانے پر نبردآزما ہیں۔ بغداد کے دورے کے دوران عراقی ذرائع ابلاغ سے گفتگو میں زیاد النخالہ نے کہا کہ مغربی کنارے میں مقاومت شدت اختیار کرنے سے صیہونی حکومت کی سیکیورٹی کو براہ راست خطرات لاحق ہوگئے ہیں۔ صیہونی دشمن بخوبی جان چکے ہیں کہ مقاومت کی طرف سے دفاعی حکمت عملی کی وجہ سے طاقت کا توازن برابر ہوگیا ہے۔
انہوں نے کہا کہ غزہ اور مغربی کنارے سمیت مختلف محاذوں پر مقاومتی تنظیموں نے دشمن کے مقابلے میں استقامت کا مظاہرہ کرکے حالات کا رخ اپنے حق میں موڑ دیا ہے۔آج طاقت کے اسی توازن کی وجہ سے صہیونی ناجائز ریاست مقاومت کے دسیوں ہزار میزائیلوں کے نشانے پر ہے۔ زیاد النخالہ نے ایران اور سعودی عرب کے درمیان تعلقات کی بحالی کے معاہدے کے بارے میں کہا کہ یہ معاہدہ ان ممالک کے لئے اہم پیغام کی حیثیت رکھتا ہے جو غاصب صہیونی حکومت کے ساتھ تعلقات قائم کرنے کی خواہش رکھتی ہیں۔ انہوں نے امید ظاہر کی کہ سعودی عرب اچھے راستے کا انتخاب کرتے ہوئے صہیونی حکومت اور عرب دشمنی پر مبنی امریکی پالیسی سے دوری اختیار کرے گا۔