جبری گمشدہ شیعہ افراد کی عدم بازیابی کے خلاف شدید گرم موسم کے باوجود جوائنٹ ایکشن کمیٹی فار شیعہ مسنگ پرسنز کے زیر اہتمام بابائے قوم قائد اعظم محمد علی جناح رحمتہ اللہ علیہ کے مزار کے سامنے مرکزی احتجاجی دھرنا تاحال جاری ہے۔ دھرنے میں ایم ڈبلیوایم کے مرکزی رہنما علامہ سید احمد اقبال رضوی، علامہ سید حیدر عباس عابدی، علامہ ڈاکٹر عقیل موسیٰ، معروف سیاستدان ڈاکٹر فاروق ستار، معروف عالم اہل سنت منظر الحق تھانوی، شیعہ علماء کونسل سندھ کے رہنما علامہ محمد علی جروار، علامہ غلام رضا سریوال، ایس یو سی کراچی کے صدر علامہ کامران عابدی، علی احمد جعفری، سابق ممبر سندھ اسمبلی میجر (ر) قمر عباس رضوی، کامران فاروقی، علامہ صادق جعفری، علامہ نشان حیدر ساجدی، علامہ امیں شہیدی، رضی حیدر رضوی، عسکری دیوجانی، سبط رضا، زین رضوی، اصغر عباس زیدی سمیت دیگر علمائے کرام، ذاکرین عظام، نوحہ و منقبت خواں حضرات، مذہبی سماجی شخصیات سمیت مومنین و مومنات کی بڑی تعداد نے شرکت کی اور خانوادہ اسیران ملت جعفریہ سے اظہار یکجہتی کیا۔ احتجاجی دھرنے سے علامہ علی رضا رضوی، علامہ کاظم عباس نقوی سمیت دیگر نے بھی خطاب کیا جبکہ میر حسن میر، ظفر عباس ظفر و دیگر نے نے بارگاہ امامت میں نذرانہ عقیدت پیش کیا۔
