زائرین سے ناروا سلوک پرایم ڈبلیوایم کے رہنما افتخار نقوی کاکھلاخط

زیادتیوں کی حساس اداروں اور غیر متعصب افسران سے تحقیقات کا مطالبہ
لاہور(پ ر)ڈپٹی سیکریٹری جنرل مجلس وحدت مسلمین پنجاب افتخار حسین نقوی نے زائرین سے ناروا سلوک پر وزیر مذہبی امور پنجاب پیر سید سعیدالحسن اور وزیر قانون پنجاب محمد بشارت راجہ کے نام کھلا خط لکھا ہے، انہوں نے لکھا کہ حکومت نے مختلف ممالک سے لوگوں کو اپنے ملک واپس آنے کی اجازت دے دی ہے،انہیں کورنٹائن سینٹرز کے بجائے ہوٹل میں لے جایا جائے گا،دوسری جانب ایران سے آنیوالے زائرین کو نہ تو قرنطینہ میں رکھا گیا اور نہ گھر بجھوایا گیا جس کی وجہ سے جو زائرین متاثر نہیں تھے وہ بھی متاثر ہوگئے، اگر وہاں بھی زائرین کودو دن قرنطینہ میں رکھ کر منفی ٹیسٹ والے کو گھر بھجوا دیا جاتا تو یہ ایشو نہ بنتا اور فرقہ وارانہ عناصر کو موقع سے فائدہ اٹھانے کا موقع نہ ملتا، انہوں نے زائرین کو 14کے بجائے 40دن تک مختلف شہروں میں رسوا کرنے پر کئی سوالات اٹھائے،اور مطالبہ کیاکہ سارے عمل کی افواج پاکستان اور سول ایجنسیز کے معزز اور غیر متعصب نیک اور دیانتدار افسران سے غیرجانبدارانہ تحقیقات کروائی جائیں تاکہ ہزاروں زائرین امام حسین ؑسے ہونے والی زیادتیوں کا ازالہ ہوسکے ورنہ یہ حقائق وقت گزرنے کے ساتھ ساتھ ناسور بن جائیں گے اور فرقہ پرست متعصب شدت پسند پاکستان مخالف دشمنوں کے اعلی کار اپنے مذموم مقاصد حاصل کرلیں گے۔