افغانستان سے انخلا میں پاکستان کو نظر انداز کرنے کا نتیجہ تباہ کن ہوگا، امریکی سینیٹر

واشنگٹن : ایک سینئر امریکی سینیٹر لنزے گراہم نے صدر جو بائیڈن کی جانب سے وزیراعظم عمران خان سے رابطے کرنے میں ہچکچاہٹ کو حیرت انگیز قرار دیا ہے۔ انہوں نے خبردار بھی کیا کہ افغانستان کے انخلا کرتے ہوئے پاکستان کو نظر انداز کرنے کا نتیجہ تباہی کی صورت میں نکل سکتا ہے۔ جنوبی کیرولینا سے تعلق رکھنے والے سینیٹر نے ٹوئٹر پیغام میں کہا کہ یہ سن کر حیرت ہوئی کہ صدر جو بائیڈن نے امریکا پاکستان تعلقات اور افغانستان کے سلسلے میں وزیراعظم عمران خان سے رابطہ نہیں کیا۔ انہوں نے صدر جوبائیڈن کو یاددہانی کروائی کہ افغانستان سےفوجی انخلا کے منصوبے میں پاکستان کا تعاون درکار ہے۔ ہم کس طرح پاکستان سے تعاون کیے بغیر افغانستان سے اپنا انخلا مؤثر ہونے کی توقع کرسکتے ہیں۔