مغربی کنارے میں آبادکاری میں توسیع کا صیہونی منصوبہ

تل ابیب : صیہونی حکومت نے بین الاقوامی مخالفت کے باوجود مقبوضہ مغربی کنارے میں آبادکاری میں توسیع کا منصوبہ بنالیا۔ اسرائیلی ٹی وی چینل نے رپورٹ دی ہے کہ صیہونی وزیرخزانہ بیزالیل اسموٹرچ نے آبادکاری کے بنیادی ڈھانچے کو بہتر بنانے کے لیے ایک ارب ڈالر مختص کرنے پر اتفاق کیا ہے۔ وزارت ٹرانسپورٹ نے مغربی کنارے کی بستیوں کو ملانے والی سڑکوں کی ترقی سمیت مختلف منصوبوں کیلئے رقم مختص کرنے کی سفارش کی تھی۔ یہ منصوبہ ایریل سیٹلمنٹ اور تفوح کے درمیان سڑک کے ساتھ ساتھ فلسطینی شہروں نابلس، سلفیت اور قلقیلیہ کے قریب بستیوں کا احاطہ کرتا ہے۔ فلسطینی انتظامیہ نے مقبوضہ فلسطین میں اسرائیل کی آبادکاری سرگرمیوں کو فلسطینی عوام کے خلاف کھلی جنگ قرار دیا ہے۔ وزارت خارجہ نے ایک بیان میں کہا کہ یہ سرگرمیاں تعمیرات کرکے کی جائیں یا پھر آبادکاری کے بنیادی ڈھانچے کے لیے لاکھوں ڈالر مختص کرکے قابل مذمت ہیں۔ بیان میں فلسطینیوں، ان کی زمینوں، مویشیوں، جائیدادوں، دکانوں اور مقدسات کے خلاف آباد کاروں کے حملوں میں اضافے کی بھی مذمت کی گئی ہے۔