Raza Musani 
تہران : آیت اللہ سید احمد خاتمی نے کہا ہے کہ ایٹمی مذاکرات کو طول دینے اور تاخیری حربے استعمال کرنے کی اجازت نہیں دیں گے۔ تہران میں نماز جمعہ کے اجتماع سے خطاب میں آیت اللہ سید احمد خاتمی نے کہا کہ ایران اور عالم اسلام میں سیاہ کارناموں کی وجہ سے امریکا کی فائل سیاہ ہے دنیائے اسلام میں امریکا کے وحشیانہ ، ظالمانہ اور مجرمانہ جرائم نمایاں ہیں۔ امریکا کی ایرانی قوم کے خلاف گھناؤنی سازشوں کا سلسلہ آج تک جاری ہے۔ اقتصادی پابندیاں ، 8 سالہ مسلط کردہ جنگ ، قاسم سلیمانی کی شہادت اور حال ہی میں ایران کے آئل ٹینکر سے تیل کی چوری امریکا کے سنگين جرائم کا حصہ ہیں۔انہوں نے کہا کہ امریکا خطے میں اسرائیل کو مضبوط بنا کر اسے اسلامی ممالک پر مسلط کرنا چاہتا ہے۔ اسرائیل کو مضبوط بنانا امریکہ کے تمام صدور کی ذمہ داری ہے۔انھوں نے ایٹمی مذاکرات کا ذکر کرتے ہوئے کہا کہ ہم مذاکرات میں تاخير، فرسودگی اور مذاکرات کو طول دینے کے حربوں کو قبول نہیں کریں گے۔ جس ملک نے عہد شکنی کی ہے اسے اپنے عہد پر عمل کرنا چاہیے۔ ہم اپنے عہد پر عمل کرچکے اور اس پر باقی ہیں۔ امریکا کے بعض اتحادی ممالک امریکہ کے وحشیانہ جرائم میں برابر کے شریک ہیں۔
