Raza Musani 
نیویارک: اقوام متحدہ کے سیکریٹری جنرل انتونیو گوتریس نے اسرائیل پر دو ریاستی حل کو نقصان پہنچانے والے اقدامات سے گریز پر زور دیا ہے۔ انتونیو گوتریس نے امریکی دورہ پر آئے صیہونی صدر اسحاق ہرزوگ سے ملاقات کی اور اسرائیل فلسطین تنازعے کے دو ریاستی حل کی حمایت کا اعادہ کیا۔ انتونیو گوتریس کے ترجمان نے بتایا کہ انہوں نے دہشت گردی کی تمام کارروائیوں کی مذمت کی اور کہا کہ انسداد دہشت گردی کی کارروائیاں بین الاقوامی انسانی قانون اور بین الاقوامی انسانی حقوق کے قانون کے مکمل احترام کے ساتھ کی جانی چاہئیں۔ حالیہ مہینوں میں مقبوضہ مغربی کنارے میں فلسطینی قصبوں پر اسرائیلی حملوں کے بعد کشیدگی عروج پر ہے۔ تشدد کا تازہ واقعہ مشرقی القدس میں پیش آیا ہے جہاں چاقو بردار کے حملے میں ایک صیہونی آبادکار زخمی ہوگیا۔ اسے فوری طور پر اسپتال منتقل کیا گیا جہاں اس کی حالت تشویشناک بتائی جاتی ہے۔
