Raza Musani 
اسلام آباد: امریکا۔ چین۔ روس۔ اقوام متحدہ۔ یورپی یونین اور ایران سمیت مختلف ممالک اور اداروں نے پاکستان میں دہشت گردی کی حالیہ لہر پر تشویش کا اظہار کیا ہے۔ اسلام آباد میں امریکی سفارت خانے کی ترجمان جوناتھن لالی نے اظہار افسوس کرتے ہوئے کہا کہ امریکا دہشت گردی کی جنگ میں پاکستان کے ساتھ کھڑا رہےگا۔ امریکا بلوچستان میں حملوں کی شدید مذمت کرتا ہے۔ چینی وزارت خارجہ کے ترجمان نے پریس بریفنگ کے دوران کہا کہ چین انسداد دہشتگردی کی کارروائیوں میں پاکستان کی بھرپور حمایت جاری رکھے گا۔ چین ہر قسم کی دہشت گردی کے خلاف مضبوط کھڑا ہے۔ یورپی یونین کی خارجہ امور اور سکیورٹی پالیسی کی ترجمان نبیلہ مسرالی نے کہا کہ دہشت گردی اور تشدد کی کسی بھی صورت میں کہیں جگہ نہیں اور یہ جمہوریت کی بنیادوں کےلیے خطرہ ہیں۔ ایرانی سفارتخانے نے بھی موسیٰ خیل اور قلات واقعے کی شدید مذمت کی۔ اقوام متحدہ کے سیکریٹری جنرل کے ترجمان اسٹیفن ڈوجارک نے کہا کہ سیکریٹری جنرل اس بات پر زور دیتے ہیں کہ شہریوں کے خلاف حملے ناقابل قبول ہیں۔ حکومت پاکستان سے مطالبہ کرتے ہیں کہ وہ تحقیقات کرے اور اس بات کو یقینی بنائے کہ ذمہ داروں کا احتساب کیا جائے۔
