Raza Musani 
تہران: ایرانی وزیر خارجہ عباس عراقچی نے ایران کی پیشرفت کے بارے میں امریکی صدر ڈونلڈ ٹرمپ کے ریمارکس کو فریب پر مبنی قرار دیتے ہوئے مسترد کر دیا ہے۔ عباس عراقچی نے امریکا کو ایران کے خلاف دہائیوں سے جاری تخریب کاری اور خطے میں اسرائیلی جرائم کی حمایت کا ذمہ دار ٹھہرایا۔ عباس عراقچی نے کہا کہ یہ امریکہ ہی ہے جس نے گزشتہ چالیس سال میں پابندیوں۔ دباؤ اور دھمکیوں کے ذریعے ایرانی قوم کی ترقی کو روکا ہے۔ انہوں نے مزید کہا کہ معاشی مسائل کا ذمہ دارامریکہ اوراس کی متکبرانہ پالیسیاں ہیں جو اس نے ایرانی عوام پر مسلط کررکھی ہیں۔ امریکی ایک تابعدار اور فرماں بردار نظام کا تقاضہ کرتے ہیں، جو ایرانی عوام کے وقار کے منافی ہے۔ عراقچی نے کہا کہ حقیقت یہ ہےکہ امریکہ خطے میں اسرائیلی جرائم پرآنکھیں بند کر لیتا ہے جبکہ ایران کو ایک خطرہ کے طور پر پیش کرنے کی کوشش کرتا ہے۔ یہ سراسر دھوکہ اور حقیقت کو مسخ کرنے کی دانستہ کوشش ہے۔
