معاہدہ توڑا تو حماس کو صفحہ ہستی سے مٹادیا جائے گا، ٹرمپ کی دھمکی

واشنگٹن : فلسطینیوں کی نسل میں اسرائیل کے شریکِ جرم امریکا کے صدر ڈونلڈ ٹرمپ نے ایک بار پھر دھمکی دی ہے کہ اگر حماس نے معاہدہ توڑا تو اسے صفحہ ہستی سے مٹادیا جائے گا۔ وائٹ ہاؤس میں آسٹریلوی وزیر اعظم کے ہمراہ نیوز کانفرنس میں ٹرمپ نے کہا کہ حماس کو غزہ کے عارضی معاہدے کو پورا کرنے کے لیے وقت دیں گے. اگر انہوں نے صحیح برتاؤ نہ کیا تو ہم اندر جائیں گے اور انہیں جڑ سے ختم کردیں گے۔ انہوں نے دھمکی دی کہ اگر انہوں نے چاہا تو اسرائیل دو منٹ میں دوبارہ اندر چلے جائے گا۔ صدر ٹرمپ نے کہا کہ امریکہ اور بین الاقوامی شراکت دار وقفۂ امن کو برقرار رکھنے کے لیے متعدد اقدامات کر رہے ہیں۔
واضح رہے کہ اسرائیل مسلسل امن معاہدے کی خلاف ورزیاں کر رہا ہے۔ اسرائیل جنگ بندی کے بعد سے اب تک 80 خلاف ورزیاں کرچکا ہے جس میں 97 فلسطینی شہید اور تین سو سے زائد زخمی ہوچکے ہیں۔
ادھر امریکی ایلچی اسٹیو وٹکوف اور صدر ٹرمپ کے داماد جیرڈ کشنر سے اسرائیلی وزیر اعظم بنیامین نیتن یاہو نے اہم ملاقات کی ہے۔ یہ ملاقات خطے کی تازہ صورتحال اور جنگ بندی کے مستقبل کے حوالے سے مشاورت کے لیے کی گئی۔