ٹونی بلیئر کا انتظامی کردار قبول نہیں کیا جائے گا، حماس

دوحہ : حماس رہنما باسم نعیم نے جنگ بندی میں کردار پر امریکی صدر کا شکریہ ادا کیا ہے تاہم انہوں نے کہا کہ غزہ کی تعمیرِ نو یا انتظامیہ میں ٹونی بلیئر کے کسی بھی قسم کے کردار کو قبول نہیں کیا جائے گا۔
اسکائی نیوز سے انٹرویو میں باسم نعیم نے کہاکہ موجودہ امن معاہدہ غزہ میں تباہی اور خونریزی کے خاتمے کیلئے ایک اہم موقع ہے اور حماس اس عمل کو آگے بڑھانے میں تعاون کے لیے تیار ہے۔ حماس رہنما نے کہا کہ ٹرمپ کو اس بات کو یقینی بنانے کے لیے اسرائیل پر دباؤ ڈالنے کی ضرورت ہوگی کہ وہ اس معاہدے پر عمل پیرا رہے۔ ٹونی بلیئر سے متعلق سوال پر باسم نعیم نے کہا کہ بلئیر کا ماضی عراق اور افغانستان کی جنگوں سے جڑا ہوا ہے اور ایسے شخص پر فلسطینی عوام اعتماد نہیں کر سکتے۔ انہوں نے کہا کہ عراق اور افغانستان کو تباہ کرنے میں اُن کا کردار ہمیں اچھی طرح یاد ہے۔