صہیونی حکومت کے خلاف ہزاروں فلسطینیوں کا احتجاجی مظاہرہ

غزہ(نیٹ نیوز) فلسطین کے علاقے غرب اردن کو ضم کرنے سے متعلق اسرائیلی اعلان کے بعد فلسطینیوں کی جانب سے سخت ردعمل کا مظاہرہ جاری ہے۔ اس سلسلے میں ہزاروں فلسطینیوں نے بدھ کی شب ہونے والے مظاہرے میں امریکہ کے سینچری ڈیل منصوبے کے خلاف نعرے لگائے اور مقبوضہ علاقوں میں غرب اردن کے بعض حصوں کو ضم کرنے کے خلاف عرب حلقوں اور عالمی برادری سے ٹھوس موقف اختیار کرنے کا مطالبہ کیا۔ اس دوران قابض فوج نے مظاہرین کو منتشر کرنے کے لیے طاقت کا بے دریغ استعمال کیا۔
صہیونی حکومت نے فلسطینی مظاہرین کو منتشر کرنے کیلئے آنسو گیس کے گولے داغے اور ساونڈ بموں کا استعمال کیا۔
واضح رہے کہ صہیونی حکام نے ابھی حال ہی میں غرب اردن کو مقبوضہ زمینوں میں ضم کرنے کے منصوبے کا اعلان کرتے ہوئے کہا ہے کہ اس پر جولائی میں کام شروع ہو جائے گا۔ اگر صہیونی حکومت اس منصوبے پر عملدرآمد میں کامیاب ہو جاتی ہے تو غرب اردن کا تیس فیصد سے زیادہ علاقہ مقبوضہ زمینوں میں ضم کر دیا جائے گا۔