قومی سلامتی پر کسی قسم کا سمجھوتا نہیں کیا جائے گا، ڈی جی آئی ایس پی آر

راولپنڈی : ڈی جی آئی ایس پی آر لیفٹیننٹ جنرل احمد شریف چوہدری کا کہنا ہے کہ پاک فوج قومی فوج ہے، جس کا کوئی سیاسی ایجنڈا نہیں ہے۔ پاک فوج کے شعبۂ تعلقاتِ عامہ کے ڈی جی لیفٹیننٹ جنرل احمد شریف چوہدری نے یہ بات میڈیا بریفنگ کے دوران کہی۔ انہوں نے کہا کہ ریاستی اداروں پر عوامی اعتماد ہی ان کا سرمایہ ہے، قومی سلامتی پر کسی قسم کا سمجھوتا نہیں کیا جائے گا، پاک فوج نہ کسی سیاسی جماعت کی مخالف ہے اور نہ طرف دار۔ انہوں نے کہا کہ فوجی قانون کے مطابق کوئی بھی شخص اگر کسی فرد یا افراد کو جو آرمی ایکٹ کے تابع ہوں ان کو اپنے سیاسی مقاصد کے لیے استعمال کرے تو قانون اپنا راستہ خود بنالے گا، فیض حمید کیس میں جو بھی شخص ملوث ہوگا کوئی بھی عہدہ اور حیثیت ہو اس کے خلاف کارروائی ہوگی۔ ڈی جی لیفٹیننٹ جنرل احمد شریف چوہدری کا کہنا ہے کہ انصاف کے تقاضے مقدم ہیں، جس کا کورٹ مارشل ہوتا ہے، اس کو ثبوت پیش کرنے اور اپیل کرنے کا حق حاصل ہوتا ہے، ریٹائرڈ افسر پر الزام ہے کہ انہوں نے مخصوص سیاسی عناصر کی ایماء پر حدود و قیود سے تجاوز کیا۔
انہوں نے مزید کہا کہ رواں سال 32 ہزار 172 آپریشنز کیے گئے، روانہ کی بنیاد پر 130 سے زائد آپریشنز کیے جارہے ہیں۔ دہشتگردی کیخلاف جنگ آخری خارجی تک جاری رہےگی، کارروائیوں میں ایک ماہ کے دوران 90 خوارج ہلاک ہوگئے ہیں، انتہائی مطلوب خارجی لیڈر ابوذر عرف صدام بھی مارا گیا۔