ہٹلر اور نیتن یاہو کے درمیان کوئی فرق نہیں ہے، ترک صدر

انقرہ : ترک صدر رجب طیب اردوان نے غزہ پر اسرائیلی حملوں کو نازیوں کے یہودیوں کے ساتھ کیےگئے سلوک سے تشبیہ دی اور کہاکہ نیتن یاہو ہٹلر سے مختلف نہیں ہیں۔ اردوان نے انقرہ میں ایک تقریب سے خطاب میں اسرائیل کے لیے مغربی حمایت پر اپنی تنقید کا اعادہ کیا اور کہا کہ سلامتی کونسل، بین الاقوامی میڈیا تنظیمیں اور یورپی یونین اس بحران میں ناکام ہوچکے ہیں۔ انہوں نے کہا کہ اسرائیل کے وزیر اعظم بنیامین نیتن یاہو غزہ میں جو کچھ کر رہے ہیں اور جو کچھ ہٹلر نے دہائیوں پہلے کیا تھا اس میں کوئی فرق نہیں ہے۔
صیہونی وزیراعظم نے اپنے ردعمل میں کہاکہ اردوان جو کردوں کی نسل کشی کرتا ہے، جو اپنی حکمرانی کے مخالف صحافیوں کو قید کرنے کا عالمی ریکارڈ رکھتا ہے وہ آخری شخص ہے جو ہمیں اخلاقیات کی تبلیغ کرسکتا ہے۔