Raza Musani 
القدس: صیہونی پولیس کی حفاظت میں آبادکار ایک بار پھر مسجد اقصیٰ کے احاطے میں گھس گئے۔ صیہونی آباد کاروں نے گروپوں کی شکل میں باب المغاربہ سے مسجد الاقصیٰ پر دھاوا بولا۔ آبادکاروں نے مسجد کے احاطے میں اشتعال انگیز دورے کیے اور وہاں تلمودی رسمیں ادا کیں۔ آبادکاروں کو پولیس اور فوج کا مکمل تحفظ اور سرپرستی حاصل تھی۔ صیہونی حکام نے جمعہ کو چھوڑ کر آبادکاروں کو روزانہ کی بنیاد پر مسجد الاقصیٰ میں گھسنے کی اجازت دے رکھی ہے۔
اس سے پہلے صیہونی پولیس نے مقبوضہ القدس میں چاقو سے حملہ کرنے کے الزام میں چودہ سالہ فلسطینی کو گولی مار دی۔ جس کی شناخت خالد سمر الزنین کے نام سے ہوئی ہے۔ صیہونی فوج کے مطابق فائرنگ سے قبل نوجوان کے مبینہ حملے میں اسرائیلی آباد کار زخمی ہوا تھا۔ اس سے پہلے رام اللہ میں بھی صیہونی فوج کی فائرنگ سے فلسطینی بچہ زخمی ہوگیا۔
