صیہونی فوج کا مسلسل دوسری رات مسجد اقصیٰ پر حملہ، نمازیوں پر تشدد، درجنوں گرفتار

مقبوضہ بیت المقدس : اسرائیل کی صیہونی فوج نے مسلسل دوسری رات مسجد اقصیٰ پرحملہ کیا اور نمازیوں کو وحشیانہ تشدد کا نشانہ بنایا۔ صیہونی فوج کے بھاری ہتھیاروں سے لیس اہلکار مسجد اقصیٰ کے احاطے میں واقع القبلی جائے نماز میں گھسے۔ پولیس نے عبادت گزاروں پر وحشیانہ حملہ کیا، انہیں بری طرح مارا پیٹا اور زبردستی بیدخل کردیا۔ مسجد اقصیٰ میں اعتکاف کرنے والے روزہ داروں پر چڑھائی کردی اور ان پر آنسو گیس کی شیلنگ کی گئی۔ عبادت گذاروں کو ربڑ اور اسٹیل کی گولیوں سے بھی نشانہ بنایا گیا۔فوجیوں کی وحشیانہ کارروائی میں مزید متعدد نمازی زخمی ہوگئے جبکہ درجنوں کو گرفتار کرلیا گیا۔ قابض فوج نے مسجد کی چھت پر چڑھ کر نمازیوں کو تشدد کا نشانہ بنایا اور انہیں مسجد اقصیٰ سے نکلنے پر مجبور کیا گیا۔ آنسو گیس سے متعدد نمازیوں کا دم گھٹ گیا اور ان کی حالت غیر ہوگئی۔ گذشتہ روز بھی اسرائیلی فوج نے مسجد اقصیٰ میں گھس کر وحشیانہ کارروائی کی تھی جس کے نتیجے میں درجنوں نمازی زخمی ہوئے اور سینکڑوں کو گرفتار کیا گیا۔