دو ریاستی حل کی بات غلط ہے، فلسطین فقط فلسطینیوں کا ہے، علامہ راجہ ناصر

اسلام آباد: مجلس وحدت مسلمین کے سربراہ سینیٹر علامہ راجہ ناصر عباس نے کہا ہے کہ کوئی شک نہیں اسرائیل ایک غیر قانونی ریاست ہے۔ایوان صدر میں اہل فلسطین سے اظہارِ یکجہتی کےلیے منعقدہ آل پارٹیز کانفرنس سے خطاب میں ایم ڈبلیو ایم سربراہ نے کہا کہ اہل فلسطین کا اپنی سزمین پر قابض اسرائیل کے ساتھ لڑنا ان کا حق ہے۔آپ کے گھر پر کوئی قبضہ کرلے تو اس کو چھڑوانا آپ کا حق ہے۔ یہ نہیں ہوسکتاہے کہ قابض کو آپ کہہ دیں کہ تم آدھا گھر رکھ لو۔ انہوں نے دو ریاستی حل کو سختی سے مسترد کردیا۔ ان کا کہنا تھا کہ اسرائیل بدترین مظالم کے باوجود مزاحمتی تحریک کو ختم نہیں کرسکا۔ انہوں نے قرآنی آیات کا حوالہ دیتے ہوئے کہا کہ ظالموں کے خلاف اللہ کی راہ میں جہاد کیوں نہیں کرتے۔ جو اللہ کی راہ میں نہیں اٹھتے ان پر عذاب نازل ہوگا۔