تہران اور بغداد کے تعلقات تاریخی اور اسٹریٹجک ہیں، عراقی صدر

بغداد: عراق کے صدر عبداللطیف رشید نے تہران اور بغداد کے تعلقات میں فروغ پر زور دیا ہے۔ ایران کے نائب وزیرخارجہ مہدی صفری اور بغداد میں ایران کے سفیر محمد کاظم آل صادق نے عراقی صدر سے صدارتی محل میں ملاقات کی۔ اس موقع پر انہوں نے ایران اور عراق کے تاریخی تعلقات پر روشنی ڈالتے ہوئے مشترکہ تعاون کو دونوں ممالک اور عوام کے مفاد کے عین مطابق قرار دیا۔ عراق کے صدر عبداللطیف رشید نے صدر سید ابراہیم رئیسی کی جانب سے دوستی اور محبت کے پیغام کا خیرمقدم کرتے ہوئے اپنے ایرانی ہم منصب اور ایرانی قوم کے لئے مزید ترقی اور پیشرفت کے لئے نیک تمناؤں کا اظہار کیا۔
انہوں نے تہران اور بغداد کے مابین تعاون میں فروغ پر زور دیا اور صدام کے دور آمریت اور داعش کے سامنے عراقی عوام کی استقامت کی حمایت میں ایران کے مرکزی کردار کو سراہا۔ ایران کے نائب وزیر خارجہ ڈاکٹر مہدی صفری نے بھی عراقی صدر کا شکریہ ادا کرتے ہوئے کہا کہ آئندہ چند روز کے دوران دونوں ممالک کی مشترکہ اقتصادی کمیٹی کا اجلاس منعقد کیا جائیگا۔