مشرق وسطی کی صورتحال پورے خطے کیلئے تشویشناک ہے، ملی یکجہتی کونسل

لاہور: ملی یکجہتی کونسل پاکستان نے مشرق وسطی کی صورتحال پورے خطے کیلئے تشویشناک قرار دیا ہے۔ آن لائن اجلاس میں صدر ملی یکجہتی کونسل صاحبزادہ ابو الخیر محمد زبیر نے کہا کہ دینی مدارس رجسٹریشن قانون سازی پر تنازع تشویش کا باعث ہے، تمام رجسٹرڈ وفاقی بورڈ اور اتحاد دینیہ مدارس کے قائدین مشترکہ اجلاس پر اکھٹے ہوں۔ انہوں نے کہا کہ دینی مدارس کی قیادت، علماء آپسی انتشار سے بچیں، مشرق وسطی کی صورتحال پورے خطے کیلئے تشویشناک ہے، پاکستان، سعودی عرب، ترکی، افغانستان، ایران خطے کے اہم ممالک ہیں، مشترکہ حکمت عملی اپنانے کیلئے اسلامی ممالک کا سربراہی اجلاس بلایا جائے۔
اس موقع پر خطاب میں سیکرٹری جنرل ملی یکجہتی کونسل لیاقت بلوچ نے کہا کہ کرم ایجنسی میں سیزفائر کا خیرمقدم کرتے ہیں، کرم پاراچنار میں وفاقی و صوبائی حکومت امن کیلئے اپنی ذمہ داری پوری کرے۔ لیاقت بلوچ کا کہنا تھا کہ شام میں تبدیلی کے بعد حکمران غزہ فلسطین کی آزادی کو ترجیح اور حمایت جاری رکھیں، ملی یکجہتی کونسل پاکستان دینی جماعتوں کی قیادت سے ملاقاتیں کرے گی۔
اجلاس میں سیکرٹری جنرل ملی یکجہتی کونسل لیاقت بلوچ، علامہ عارف حسین واحدی، مفتی گلزار نعیمی، قاری یعقوب شیخ، سید ناصر عباس شیرازی، سید اسدعباس نقوی شریک ہوئے۔