فوری اقدامات نہ کیے تو غزہ کی صورتحال انتشار میں بدل سکتی ہے، فلسطینی وزیراعظم

رام اللہ : فلسطینی وزیراعظم محمد مصطفیٰ نے خبردار کیا ہے کہ اگر فوری اقدامات نہ کیے گئے تو غزہ میں صورتحال بدامنی اور انتشار میں بدل سکتی ہے۔
رام اللہ میں کابینہ اجلاس سے افتتاحی خطاب میں وزیراعظم محمد مصطفیٰ نے کہا کہ دو برسوں سے قتل و جبری بے دخلی کی عوام نے بھاری قیمت ادا کی ہے، اور یہ قربانیاں بدامنی پر ختم نہیں ہونی چاہییں۔ انہوں نے واضح کیا کہ اس وقت ایک واضح اور متحد قومی مؤقف کی ضرورت ہے جو اسرائیلی قبضے کی پالیسیوں کا مقابلہ کرے اور فلسطینی حکومت کو غزہ میں اپنی مکمل ذمہ داریاں سنبھالنے کے قابل بنائے۔ انہوں نے کہا کہ عالمی سطح پر امدادی اور تعمیرِ نو کی کوششوں میں سست روی خطرناک ہے۔ کابینہ نے عالمی برادری سے مطالبہ کیا کہ وہ اسرائیل کو غزہ، مغربی کنارے اور القدس میں حملے روکنے پر مجبور کرے، کیونکہ اسرائیلی اقدامات فلسطینی ریاستی اداروں کو کمزور کر رہے ہیں۔