Raza Musani 
کراچی : گزشتہ روز دھرنے کے شرکاء پر دھاوا بولنے والی سندھ پولیس نے اب انہی کیخلاف مقدمات درج کرلئے۔
نمائش چورنگی پر احتجاج کا مقدمہ تھانہ سولجربازار میں درج کیا گیا ہے۔ جسمیں علامہ حسن ظفر نقوی سمیت پانچ علمائے کرام سمیت ساڑھے تین سو نامعلوم مرد اور خواتین کو نامزد کیا گیاہے۔ مقدمے میں پولیس پر حملوں، جلاؤ گھیراؤ اورا نسداد دہشت گردی کی دفعات شامل کی گئی ہیں۔ ایف آئی آر میں کہا گیاہےکہ مشتعل افراد کی فائرنگ، پتھراو اور ڈنڈوں کے وار سے چھ پولیس اہلکار زخمی ہوئے۔ مشتعل افراد نے چار موٹر سائیکلوں کو آگ لگائی۔ پولیس کارروائی کے دوران ہنگامہ آرائی میں ملوث 19 افراد کو گرفتار کیا گیا ہے۔
ملیر میں احتجاج کا مقدمہ سعود آباد تھانے میں درج کیا گیا ہے۔ مقدمہ تین نامزد اور ڈیڑھ سو نامعلوم افراد کے خلاف درج کیا گیا ہے۔ مقدمے میں ہنگامہ آرائی، بلوہ، انسداددہشتگردی اور پولیس پر حملے کی دفعات شامل کی گئی ہیں۔ ایف آئی آر کے مطابق شرپسندوں نے فائرنگ کرکے کانسٹیبل ضیغم اور ایاز گل کو زخمی کیا، پتھراو سے پولیس موبائل کونقصان پہنچا اور تین موٹر سائیکلیں جلائی گئیں۔
