Raza Musani 
جدہ : اسلامی تعاون تنظیم او آئی سی نے صیہونی آبادکاروں کے مسجد اقصیٰ کے احاطے پر دھاوا بولنے کی شدید مذمت کی ہے۔ تنظیم نے اسے مسلمانوں کے مذہبی جذبات کی توہین اور مقدس مقامات کی حرمت کی سنگین خلاف ورزی قرار دیا۔اسلامی تعاون تنظیم نے اپنے بیان میں کہا کہ سینکڑوں اسرائیلی آبادکاروں نے وزیر قومی سلامتی اتمار بن گویر کی قیادت میں مسجد اقصیٰ میں داخل ہوکر مقدس مقام کی بے حرمتی کی۔ بیان میں کہا گیا ہے کہ یہ واقعہ جنیوا کنونشن اور اقوام متحدہ کی متعلقہ قراردادوں کی صریح خلاف ورزی ہے۔
او آئی سی نے الخلیل میں ابراہیمی مسجد کی بندش کی بھی مذمت کی، اسے اسلامی مقدس مقامات اور عبادت کی آزادی پر حملوں کا تسلسل قرار دیا۔ بیان میں عالمی برادری سے مطالبہ کیا گیا کہ وہ فوری طور پر اقدامات کرے تاکہ مقبوضہ شہر القدس کی تاریخی اور قانونی حیثیت کا تحفظ کیا جا سکے۔
ادھر حماس نے کہا ہے کہ یہ حملہ اسرائیلی حکومت کے فسطائی ذہن کی عکاسی کرتا ہے جو مسلم مقدس مقامات کو نشانہ بنانے کی منظم پالیسی پر عمل پیرا ہے۔
