سعودی عرب اور حوثیوں میں مذاکرات کا اگلا دور عید کے بعد ہوگا

صنعا: یمن میں جنگ کے خاتمے کیلئے سعودی عرب اورحوثیوں کے درمیان مذاکرات کا اگلا دور عید الفطر کے بعد ہوگا۔ سعودی عرب اورحوثیوں کےدرمیان قیدیوں کے تبادلے کے بعد مستقل جنگ بندی کیلئے مزید پیشرفت ہوئی ہے۔ یمن میں حوثیوں کی زیر قیادت حکومت کے صدر مہدی المشاط نےکہا ہے کہ سعودی عرب کے ساتھ مذاکرات میں پیشرفت کے بعد اگلا دور عید کے بعد ہوگا۔ انہوں نے خبردار کیا کہ اگر جارح اتحاد دوبارہ فوجی محاذ آرائی شروع کرنے اور امن کے اقدامات میں رکاوٹ ڈالنے کا سوچتا ہے تو یمن کا ہاتھ سب سے لمبا اور مضبوط پائے گا۔ حوثیوں نے سعودی نواز یمن حکومت کے ساتھ 869 قیدیوں کا تبادلہ مکمل ہونے کے بعد ایک نئے معاہدے کا اعلان کیا ہے۔ حوثی کمیٹی برائے امور اسیران کے سربراہ عبدالقادر المرتضیٰ نے کہا کہ آئندہ معاہدے کے تحت 14 سو قیدی رہا کئے جائیں گے دونوں فریق یکساں قیدی رہا کریں گے۔ تاہم انہوں نے معاہدے کی تاریخ کے بارے میں کوئی تفصیلات فراہم نہیں کیں۔ جبکہ انٹرنیشنل کمیٹی آف ریڈ کراس نے بھی فی الحال تصدیق نہیں کی ہے۔ گزشتہ سال اقوام متحدہ کی ثالثی میں 2000 قیدیوں کی رہائی کے معاہدے پر دستخط ہوئے تھے۔