مذاکرات سے پیچھے ہٹیں گے اور نہ مفادات کیخلاف مطالبات تسلیم کریں گے، ایرانی صدر

تہران : اسلامی جمہوریہ ایران کے صدر سید ابراہیم رئیسی نے کہا ہے کہ ایران مذاکرات کی میز کو چھوڑے گا اور نہ ہی ضرورت سے زیادہ ایسے مطالبات کو تسلیم کرے گا جو ایرانی قوم کے مفادات کے خلاف ہوں۔ ہم عوام کے حقوق و مطالبات سے ذرہ برابر بھی پیچھے نہیں ہٹیں گے اور جب تک ظالمانہ پابندیاں ختم نہیں ہوجاتیں اپنے موقف پر قائم رہیں گے۔ ہم نتیجہ خیز مذاکرات چاہتے ہیں جس سے امریکا کی غیرمنصفانہ پابندیاں ختم ہوسکیں۔ سمنان میں سامراج کے خلاف جدوجہد کے قومی دن کے موقع پر امریکا مخالف ریلی کے شرکا سے خطاب میں ابراہیم رئیسی نےکہا کہ ایران سے امریکا کی دشمنی صرف 40سال سے نہیں ہے بلکہ وہ 70برس پہلے سے ایرانی عوام کی دولت و ثروت کو لوٹنے کی کوشش کررہا تھا۔ اپنی مرضی کی حکومت مسلط کرتا تھا اور کامیاب بھی رہتا تھا، لیکن پچھلے بیالیس برسوں میں یعنی اسلامی انقلاب کی کامیابی کے بعد کے برسوں میں امریکا کی نہ ختم ہونے والی دشمنیوں کے مقابلے میں ایرانی عوام ہی ہمیشہ فاتح رہے ہیں۔