Raza Musani 
تہران : ولی امرمسلمین آیت اللہ سید علی خامنہ ای نے کہا ہےکہ سامراجی طاقتوں نے قوموں کولوٹنے کیلئے نرم جنگ چھیڑرکھی ہے ممتاز دانشوروں، اساتذہ اور غیر معمولی ذہانت کے حامل نوجوان طلبا و طالبات سے ملاقات میں ولی امرمسلمین نے کہا کہ استعماری قوتوں کا نرم جنگ کا ایک طریقہ جو ہمیشہ رہا ہے اور آج بھی جاری ہے اور ماضی میں کچھ زیادہ ہی تھا، وہ یہ ہے کہ غیرمعمولی ذہانت کی مالک قوموں کو انکی توانائیوں سے غافل کریں اور ان کو اس طرح بنادیں کہ وہ خود اپنی توانائیوں کا ہی انکار کرنے لگیں۔ اگر کسی قوم میں یہ سوچ پیدا ہوجائے کہ اس کے اندر صلاحیت نہیں پائی جاتی تو اس کو لوٹنا اور تباہ و برباد کرناآسان ہوجاتاہے۔درحقیقت ہمارا ملک اور ہمارے عوام ذہنی استعداد کے لحاظ سے غیر معمولی ذہانت کے مالک ہیں اسی لئے سامراجی طاقتیں ایک عرصے سے ہم پر سافٹ وار مسلط کئے ہوئے ہیں۔ انہوں نے کہا کہ گزشتہ دو سو برسوں سے سامراج اور ایران کے اس وقت کےحکام ایک آواز ہو کر یہ پروپیگنڈہ کرتے تھے کہ ایرانی عوام میں استعداد و صلاحیت نہیں پائی جاتی لیکن اسلامی انقلاب کی کامیابی نے اس جھوٹے پروپیگنڈے پر خط بطلان کھینچ دیا۔
