بگن میں حکومتی کانوائے پر فائرنگ امن معاہدے کی پہلی خلاف ورزی ہے، قبائلی عمائدین

پاراچنار: پاراچنار پریس کلب کے باہر جاری دھرنا موخر کرنےکا اعلان کرتے ہوئے شرکاء کا کہنا تھا کہ مطالبات تسلیم نہ ہونے کی صورت میں دوبارہ دھرنا شروع کیا جائے گا۔ علامہ فدا مظاہری نے کہا کہ دھرنا موخر کرنے کا فیصلہ قومی مفاد میں کیا گیا ہے۔ تحصیل چیئرمین اپر کرم آغا مزمل حسین کا کہنا تھا کہ دھرنا راستے کھولنے سمیت اپنے مطالبات کی خاطر شروع کیا گیا تھا۔ احتجاجی دھرنے میں پریس کانفرنس سے قبائلی رہنما حاجی عابد حسین، تحصیل چیئرمین آغا مزمل حسین، جاوید علی شاہ و دیگر رہنماؤں نے خطاب کیا۔
قبائلی عمائدین نے لوئر کرم میں ڈپٹی کمشنر، پولیس اور ایف سی کے قافلے پر فائرنگ کے واقعہ کی مذمت کرتے ہوئے اسے امن معاہدے کے خلاف ورزی قرار دیا ہے۔ عمائدین نے کہا کہ 3 ماہ سے راستوں کی بندش کے باعث پریشان حال عوام کی مشکلات مزید بڑھ گئی ہیں، علاج و سہولیات نہ ملنے سے روزانہ بچوں سمیت دس مریض دم توڑ رہے ہیں۔ رہنماؤں نے کہا کہ ہم وفاقی اور صوبائی حکومت کی چپقلش میں پھنس کر اذیت ناک کیفیت کا شکار ہیں، بگن فائرنگ امن معاہدے کی پہلی خلاف ورزی ہے۔ انہوں نے کہا کہ حکومت امن معاہدے کی رو سے کارروائی کرے اور آمد و رفت کے راستے فوری طور کھول کر انہیں محفوظ بنائے، ہمیں مزید احتجاج پر مجبور نہ کیا جائے۔