Raza Musani 
تہران: ایرانی صدر آیت اللہ سید ابراہیم رئیسی نے کہا ہے کہ شنگھائی تعاون تنظیم اور برکس میں ایران کی رکنیت سے ظاہر ہوتا ہے کہ دشمن بین الاقوامی میدان میں ایران کو تنہا کرنے میں ناکام رہے ہیں۔ایران بین الاقوامی کانفرنس سینٹر کے مقام پر نیوز کانفرنس سے خطاب میں ایرانی صدر نے کہاکہ پڑوسی ممالک کے ساتھ ایران کے تجارتی تعاون میں 14 فیصد اضافہ ہوا ہے۔
لاطینی امریکہ، افریقہ اور ایشیا میں منڈیوں کی ترقی ایرانی حکومت کی پالیسیوں کے مطابق ہے۔ انہوں نے کہاکہ شنگھائی تعاون تنظیم اور برکس میں ایران کی رکنیت یقینی طور پر امریکی یکطرفہ پسندی کا مقابلہ کرنے کے لیے بہت اہمیت کی حامل ہے۔ ایران اس سلسلے میں بڑی اور منفرد صلاحیتوں کا حامل ہے۔
انہوں نے کہا کہ بعض عناصر کا یہ خیال ہے کہ مسائل کا حل کچھ مغربی ممالک سے رابطہ قائم کرنے میں پوشیدہ ہے۔ لیکن ان پر یہ واضح کردوں کہ ہم مغربیوں کے مسکرانے کا انتظار نہیں کریں گے اور ہم اپنے لوگوں کی زندگی اور معیشت کو مغربیوں کی مسکراہٹوں سے مشروط نہیں کر سکتے۔
