غزہ کی تباہی آنے والی نسلوں تک اثرات چھوڑے گی، ٹیڈروس

عالمی ادارہ صحت کے ڈائریکٹر جنرل ڈاکٹر ٹیڈروس نے خبردار کیا ہےکہ غزہ صحت عامہ کی ایسی تباہی سے گزر رہا ہے جو آنے والی نسلوں تک اپنے اثرات چھوڑے گی۔ ڈبلیو ایچ او کے سربراہ ڈاکٹر ٹیڈروس نے بی بی سی سے گفتگو میں کہا کہ غزہ کے عوام کی پیچیدہ ضروریات پوری کرنے کے لیے امداد میں بڑے پیمانے پر اضافہ ناگزیر ہے۔ انہوں نے کہا کہ اسرائیل کی جانب سے امداد کی ترسیل کو یرغمالوں کی باقیات کی واپسی سے مشروط کرنا غیرانسانی ہے۔ امداد کو ہتھیار کے طور پر استعمال نہیں کیا جانا چاہیے۔انہوں نے کہا کہ امداد کی فراہمی پر کسی قسم کی شرط نہیں ہونی چاہیے اور تمام گزرگاہیں کھولنی چاہئیں تاکہ ضروری سامان غزہ پہنچ سکے۔ ڈاکٹر ٹیڈروس نے امریکا سے مطالبہ کیا کہ چونکہ وہ اس جنگ بندی کا ضامن ہے اس لیے اس کی ذمہ داری ہے کہ دونوں فریقوں کو معاہدے پر عمل کروائے۔