Raza Musani 
لاہور: پنجاب کے شعبہ انسداد دہشت گردی نے دعویٰ کیا ہے کہ دہشت گردی کا منصوبہ ناکام بناتے ہوئے کالعدم تنظیموں کے آٹھ دہشت گردوں کو گرفتار کر لیا۔ ترجمان کے مطابق سی ٹی ڈی پنجاب نے دہشت گردی کے کسی بھی ناخوشگوار واقعہ سے مؤثر طریقے سے نمٹنے کے لیے صوبہ بھر کے مختلف اضلاع میں 74 خفیہ آپریشنز کئے جن کے دوران 74 مشتبہ افراد سے پوچھ گچھ کی گئی اور کالعدم تنظیموں کے 8 دہشت گردوں کو گرفتار کرکے ان کے قبضہ سے اسلحہ دھماکہ خیز و دیگر ممنوعہ مواد برآمد کر لیا گیا۔ دہشت گردوں کا تعلق کالعدم تنظیموں تحریک طالبان پاکستان، داعش، سپاہ صحابہ پاکستان، لشکر جھنگوی اور القاعدہ سے ہے۔ دہشت گردوں کی گرفتاری راولپنڈی، لاہور، ملتان اور گوجرانوالہ میں انٹیلی جنس بیسڈ آپریشن کے دوران عمل میں لائی گئی۔
