روس کا یوکرین پر کیمیائی ہتھیاروں کے استعمال کا الزام

ماسکو: روس نے یوکرین پر کیمیائی ہتھیاروں کے استعمال کا الزام لگادیا۔ روس کی ریاستی تحقیقاتی کمیٹی نے بتایا کہ وہ مشرقی یوکرین کے قصبوں سولیدار اور باخموت کے قریب یوکرینی افواج کی طرف سے کیمیائی ہتھیاروں کے مبینہ استعمال کی جانچ کر رہی ہے۔ کمیٹی نے روسی فوجیوں میں خرابی صحت اور زہر کی علامات کا حوالہ دیا ہے جو یوکرائن کے دو مشرقی شہروں کے قریب تعینات تھے۔ روس کے الحاق کرنے والے خطے ڈونیٹسک میں حکام نے بتایا کہ یوکرینی فوج نے مشرقی شہروں کے قریب کیمیائی ہتھیاروں کو گرانے کے لیے ڈرون کا استعمال کیا ہے۔ یوکرین کی مسلح افواج نے روسی الزام کو مسترد کرتے ہوئے کہا کہ انہوں نے کسی بھی وقت کہیں بھی کیمیائی ہتھیاروں کا استعمال نہیں کیا۔ یوکرین نے ماسکو پر غلط معلومات پھیلانے اور خود ممنوعہ ہتھیاروں کے استعمال کا الزام لگایا۔