پاراچنار: پیواڑ کے جنگل کا مسئلہ حل اور قانون شکن عناصر کے خلاف کارروائی کی جائے، عمائدین

پاراچنار : ضلع کرم کے علاقے پیواڑ میں علی زئی قبائل نے جنگل کے مسئلہ کو حل کرنے اور قانون شکن عناصر کے خلاف کارروائی کا مطالبہ کیا ہے۔ پاراچنار میں مشترکہ پریس کانفرنس میں قبائلی عمائدین نے کہا کہ 23 اکتوبر کو قبائلی افراد لکڑیاں کاٹنے اپنے آبائی جنگل گئے تھے کہ مخالف گیدو قبائل نے فائرنگ کردی جس سے 11 افراد شہید اور 15 زخمی ہوئے۔ علیزئی قبائل علاقے کے حقیقی وارث اور مالکان ہیں۔ گیدو قبائل کو زمینوں کی دیکھ بھال کیلئے رکھا گیا تھا جو اب زمینوں کے مالک بن بیٹھے ہیں۔ عدالت، ضلعی انتظامیہ اور دیگر متعلقہ ادارے کاغذات مال کو مدنظر رکھتے ہوئے فوری اقدامات اٹھائیں اور قانون شکن عناصر کے خلاف کاروائی کریں اور عدالتوں میں زیر سماعت مقدمات پر فوری فیصلے صادر کئے جائیں۔