Raza Musani 
راولپنڈی : مجلس وحدت مسلمین کے سربراہ سینیٹر علامہ راجہ ناصر عباس جعفری نے پنجاب میں مومنین کو شیڈول فورتھ میں ڈالنے کی شدید الفاظ میں مذمت کی ہے۔ انہوں نے ایک بیان میں کہا کہ عزاداروں اور عزاداری کے خلاف پنجاب حکومت کی انتقامی کارروائیاں ملت و تشیع کے اضطراب اور غصے میں اضافے کا باعث ہیں۔ ملتان انتظامیہ نے محرم، صفر کے دوران سبیلیں لگانے اور عزاداروں کو مطلوبہ ضروریات مہیا کرنے والے بیسوں افراد کو شیڈول فورتھ میں ڈال کر یہ ثابت کیا ہے کہ پنجاب حکومت آئین کے تحت ملنے والی مذہبی آزادی اور جمہوری روایات کو تسلیم کرنے سے انکاری اور شاہانہ اختیارات و فرعونی طاقت کو استعمال کرنے کے لیے بے تاب رہتی ہے۔انہوں نے کہاکہ میانوالی میں نہتے عزاداروں پر حملہ کر کے شہید کرنے والے دندناتے پھر رہے ہیں اور عزاداروں پر مقدمات کا اندراج کر دیا گیا۔ ملت تشیع کے خلاف پنجاب حکومت کی نفرت اب ڈھکی چھپی نہیں رہی۔ انہوں نے کہا کہ ہم فکر و اظہار اور مذہبی آزادی پر کوئی سمجھوتہ کرنے کے لیے تیار نہیں۔ ملتان میں مومنین کو شیڈول فورتھ میں ڈالنے کی شدید الفاظ میں مذمت کرتا ہوں اور پنجاب کی غاصب حکومت کو متنبہ کرتا ہوں کہ ایسے متعصبانہ ہتھکنڈوں سے باز رہے.
