پنجاب اسمبلی کے الیکشن ملتوی، ملک میں نیا تنازعہ

اسلام آباد: الیکشن کمیشن نے 30 اپریل کو ہونیوالے پنجاب اسمبلی کے انتخابات ملتوی کرکے نیا تنازع کھڑا کردیا ہے۔ الیکشن کمیشن نے جاری حکم نامے میں کہا ہے کہ آئینی اختیارات کے تحت انتخابی شیڈول واپس لیا گیا ہے اور پنجاب میں الیکشن 8 اکتوبر کو ہوں گے۔ نیا شیڈول بعد میں جاری کیا جائے گا۔ اس وقت حالات سازگار نہیں۔ پولیس اہلکاروں کی بڑے پیمانے پر کمی اور اسٹیٹک فورس کے طور پر فوجی اہلکاروں کی عدم فراہمی کی وجہ سے الیکشن ملتوی کرنے کا فیصلہ کیا گیا۔ الیکشن کمیشن نے صدر مملکت کو فیصلے سے آگاہ کردیا ہے۔ تاہم اپوزیشن جماعت پاکستان تحریک نے اعلان کو مسترد کردیا ہے اور اسے سپریم کورٹ کے احکامات کی پامالی قرار دیا ہے۔ سابق وزیراعظم عمران خان کا کہنا ہے کہ الیکشن کمیشن نے انتخابات ملتوی کرکے آئین شکنی کی ہے۔ ہم نے پنجاب اور خیبرپختونخوا کی اسمبلیاں اس لیے نہیں توڑی تھیں کہ فاشسٹوں کا گروہ آئین و قانون سے کھلواڑ کرے۔ اس وقت خاموش رہنا پاکستان میں آئین و قانون کی بالادستی ختم کرنا ہے۔