پی ٹی آئی کا 15 اکتوبر کو ڈی چوک پر احتجاج کا اعلان، حکومت پریشان

اسلام آباد: پاکستان تحریک انصاف نے پندرہ اکتوبر کو شنگھائی تعاون تنظیم کے سربراہ اجلاس کے موقع پر ڈی چوک پر بھرپور احتجاج کا اعلان کر دیا۔ پاکستان تحریک انصاف کے مرکزی سیکریٹری اطلاعات شیخ وقاص اکرم نے پارٹی کی سیاسی کمیٹی کے ہنگامی اجلاس کا اعلامیہ جاری کردیا۔ اعلامیہ کے مطابق کہ پی ٹی آئی 15 اکتوبر کو اسلام آباد کے ڈی چوک پر بھرپور احتجاج کرے گی۔ جس کے پیش نظر پنجاب میں احتجاج منسوخ کردئے گئے ہیں۔ شیخ وقاص اکرم نے کہا کہ مینڈیٹ چور اور آئین و قانون سے بے زار حکمران ظلم اور سفاکیت ترک کرنے پر آمادہ نہیں ہیں۔ اڈیالہ میں ناحق قید بانی پی ٹی آئی کو بطورِ خاص بربریت کے نئے سلسلے کا نشانہ بنایا جا رہا ہے۔
حکومت نے پی ٹی آئی کی کال کو عدم استحکام پیدا کرنے کی کڑی قرار دے دیا۔ وزیر اطلاعات عطاءاللہ تارڑ نے کہا ہے کہ اجلاس خوش اسلوبی سے آگے چلے گا۔ شرپسندوں کو رخنہ ڈالنے کا موقع نہیں ملے گا۔ وفاقی وزرا نے احتجاج کے اعلان کو ملک میں عدم استحکام پیدا کرنے کی کڑی قرار دیا ہے۔ وزیر دفاع خواجہ آصف نے کہا کہ یہ بین الاقوامی سازشوں کے مہرے ہیں۔ ملک کو یرغمال بننے نہیں دیں گے۔ وزیر اطلاعات عطا اللّٰہ تارڑ نے کہاکہ سازشی ذہنیت والوں کو گھر بیٹھنا چاہیے۔ لیگی رہنما اور وزیراعظم کے مشیر رانا ثنااللہ نے کہا کہ پی ٹی آئی سیاسی جماعت نہیں انتشاری ٹولہ ہے۔ پاکستان دشمن لوگ ملکی مفاد کے خلاف کمربستہ ہیں۔ احتجاج کے اعلان کے بعد یہ پوری طرح بے نقاب ہوگئے ہیں۔ انہیں ان کی کمیں گاہوں تک محدود کردیا جائے۔