Raza Musani 
اسلام آباد: پاکستان تحریک انصاف نے اجازت نامے کی منسوخی پر آج اسلام آباد میں ہونے والا جلسہ ملتوی کردیا۔ انتظامیہ نے پی ٹی آئی کو آٹھ ستمبر کو جلسے کی اجازت دیدی۔ ڈسٹرکٹ مجسٹریٹ اسلام آباد نے چالیس ہدایات کے ساتھ نوٹیفکیشن جاری کردیا۔ نوٹیفکیشن کے مطابق آٹھ ستمبر کو انتظامیہ جلسے کو سیکیورٹی فراہم کرے گی۔ کسی بھی شہری کے بنیادی حقوق متاثر نہیں کئے جائیں گے۔ منتظمین جلسہ چار بجے شروع اور سات بجے ختم کرنے کے پابند ہوں گے۔ آج ہونے والا جلسہ ملتوی کرنے کا اعلان پی ٹی آئی رہنما اعظم خان سواتی نے کیا۔ چیئرمین پی ٹی آئی بیرسٹر گوہر خان نےکہا کہ جلسہ بانی پی ٹی آئی کی ہدایت پر ملتوی کیا گیا ہے۔ گذشتہ روز چیف کمشنر اسلام آباد نے ڈسٹرکٹ انٹیلی جنس کمیٹی کی رپورٹ پر جلسے کا این او سی منسوخ کردیا تھا۔ جبکہ ڈپٹی کمشنر نے بچوں کی حفاظت کے پیش نظر اسکول بھی بند رکھنے کا اعلان کیا۔ سیکورٹی خدشات پر ریڈ زون کو گذشتہ رات کنٹینر لگاکر سیل کردیا گیا تھا۔ راولپنڈی اور اسلام آباد میں میٹرو بس سروس بھی معطل ہے۔ جبکہ محکمہ داخلہ پنجاب نے بھی صوبہ بھر میں تین روز کیلئے دفعہ ایک سو چوالیس نافذ کردی تھی۔
